bobo20082020

如果真係好似個題目咁.......我既經歷慘過呢個故事好多好多...........但係個女仔既然寫呢個經歷~佢一定好傷好痛..!!!我都想看看最後點樣???

碧根鮑華

下面引用由御琳在 2004/12/27 05:19pm 發表的內容：
我想繼續睇落去ar...唔該你繼續post...
好可能呢d故事日日都發生o係唔同既人身上..
但始終係一個女仔既真人故事...
可能大家會覺得冇乜特別...一d都唔偉大...
...

我好同意你呢一點...個陣時我睇到呢一段我都覺得佢應該死心離開佢....
但係我睇晒成個故事後,我係佢既觀點黎睇....
個男仔對佢真係真係好重要....佢之後都知道佢唔應該鍾意個男仔...佢試過死心...
可能個男仔係佢心目中實左冇人可比...佢做唔到....太愛佢喇...
其實睇佢呢故事唔洗太偏激...當故仔睇...睇完就算....
我都同意佢蠢...但係呢個男仔既重要性對於佢黎講,我地呢d旁觀者係唔會知道....
可能未來有一個人都可以令到你對佢死心塌地呢...可能比起呢個女仔更加激呢...
(冇意得罪任何人)

碧根鮑華

既然有會員想繼續睇...我就post啦....
繼續....
之後我地就愈黎愈多野嘈,乜都嘈一餐,
同佢一齊之後,我由十幾名,一跌跌到考第尾,
由日日都返學,變到一個星期都唔知返唔返到3日,
仲差d唔夠出席率考會考
(因為我學校d朋友全部都係男仔,so佢唔鍾意我返學)
開始同屋企人反哂面(因為我屋企人唔鍾意佢)
開始無哂朋友(因為佢唔鍾意我同第2個人去街)
日日放學就去黃大仙搵佢,
半夜3-4點先搭車返屋企換衫返學,
有時佢半夜話想第2日朝早有早餐食,
我會專登去買比佢食,
睇住佢食完先係黃大仙搭車返屯門返學,
成日都唔返屋企訓.
我將所有零用錢,
所有時間,心機,精神都放哂係佢身上,
可能我地愛得太盡,
可能我地愛得太轟烈,
可能我地開始得太快,
可能我地愛得太盲目...
我為左呢段感情,不惜一切,
我返到school,都淨係識望住佢張相上堂,
all book 都痴哂佢d相,
全校既miss 同阿sir同學都知我有男朋友,
有時佢仲會黎等我放學,
我學校d女仔仲會聊佢,
我d醋意亦都愈黎愈勁....
唔知點解佢個身會有陣香味,
唔係香水唔係沐浴露,
係佢出汗果陣會有陣好似雪糕咁既味,
亦都係呢陣味同佢既樣貌,
成日都吸引到好多女仔痴埋去,
我同佢當時都仲有玩icq,
但係成日都會佢扮我玩我icq,我又扮返佢玩佢icq,
一係我扮仔溝女,一係佢扮女溝仔,

但係有次無意中,我發現,原來佢係我唔係佢屋企既時候,
同好多女仔玩icq,仲要勁口花,其中一個...........仲要係貓仔,
我唔敢開口問,我驚佢會呃我,我唯有扮唔知,

有一日夜晚,我扮訓覺,竟然聽到佢以為我訓著左,
出去打電話,我聽到原來電話果個係貓仔,我勁失望,
一直都以為佢地已經無乜點聯絡,原來唔係無,只係我唔知,
我真係覺得自己好蠢,點解一d都發覺唔到,
於是又再因為咁,我開始對佢冷淡,愈黎愈敷衍,
我唔知呢個人幾時會再呃我,佢問我,點解對佢d態度變哂,
但係我無答到佢,我知我講左佢一定會話我神經側.
自己亂諗野就當係真,
估唔到佢竟然同我講,叫我改下我d態度同性格,
問題真的在我身上嗎...?
點解到頭來係佢叫我改...?
我有d咩要改...?
結果佢倒返轉頭話我對佢唔信任,
又係我哄返佢(明明係我嬲佢先....點解結果係我哄返佢)
為左表示我對佢百分百信任,
我由佢屋企出門口開始,合埋雙眼,
淨係捉實佢對手咁行出去,
由黃大仙,行到去太子搭車,
足足行左一個鐘,全程都係合埋眼,
仲要係半夜,
中途仲去左一間要上樓梯既 7-11,
途人都望住我,以為我真係盲既,
行行下又聽到狗吠聲,
感覺到d狗係我附近(因為我勁驚狗,一見到狗就掉頭走)
但係我都無放開過雙手,因為我相信,佢會係我身邊保護我,
再行行下,鄧一聲撞左埋條燈柱到.,
我個頭即時魚左,我都係無開過眼,
Billy:傻架咩你,又會唔縮都有既...!
我:咩喎..我話過信哂你架嘛,點知你咁衰,整古我姐..
Billy:係喎...你真係無開過眼喎
我:跟係啦,你估你呀,大隻講,
Billy:陰公囉,魚左呀,唔緊要,錫返錫返,啜........
我:哼,蝦我
最後,我都係去到車站先開眼,
果時佢攬得我好實好實,感覺好實在,
好似全世界得我地兩個咁.....
佢好似鍾意果d同居feel,
所以我地兩個都會成日著t-shirt ,拖鞋落街市買送,
好似老夫老妻咁,
最好笑既係,次次買完,結果都係係街食埋先返屋企,
因為我成日都係佢屋企訓,已經好似搬左入去住咁,
d公仔都囉哂過去,d衫呀鞋呀都係,
所以佢阿媽就搬左去第2度住,
留返間room比我地兩個,
等我地唔洗成日兩個人迫埋張梳化,
唔洗兩個人成日係廳訓地下,
我會成日幫佢洗衫,執屋,洗碗,同煮飯佢食,
試過佢病左,我想落街買野煲粥比佢食,但係佢唔比我離開佢身邊,
所以,我趁佢訓左,靜靜雞落街買野煲粥,
我煲完佢就岩岩起身訓醒,
Billy:你岩岩去左邊呀?
我:你又知我走開左既?
Billy:我未病到傻喎,攬攬下隔離無左個人,我點會唔知喎,
我:你唔好理丫,你起身起得岩岩好,食粥丫,我餵你食丫,岩岩煲好
Billy:我.............原來你去左買野煲粥.....皮蛋瘦肉?...
我:你點知架?
Billy:.........好感動.................+___________+"第一次有女仔煲粥比我食
我:其實,我都係第一次煲粥比人食.....
我地又會成日無聊講返細個玩d乜啦,小學pe堂會做咩,
之後兩條友係屋企做小學pe堂果d熱身運動,
又會去周圍搵返小學成日買果d零食,
媽咪麵啦,牛牛爆谷啦,戒指糖啦,玻璃樽汽水啦,奇多圈啦,
得佢一個先會陪我做d咁無聊既野,
佢又會帶我去佢以前住果度,去佢細個好鍾意去既粥店食粥,
又會同我去沙灘,係沙灘咩住我跑,點知踩到野,搞到隻腳損左,
有時我行行下街胃痛到行唔到,
佢就由佐敦咩到我去mk果間e院睇e生,
去到果時我見到佢成頭係汗,
我咁肥,我知道,佢一定好辛苦,
佢送比我果隻戒指,因為唔係純銀,
我帶到敏感,但係因為係佢送,我唔捨得除,
佢發脾氣話隻戒指整到我手指損哂,
親手整爛左...........
不知不覺,就去到xmas,
但係呢個xmas,一d都唔開心,
待續.....

碧根鮑華

好啦好啦....
不過除左你...
我都想多d會員去睇....俾d支持啦.....
繼續……
平安夜.......
佢唔肯出街,因為佢唔鍾意同人迫,佢係果d怪怪地既人,
但係我係好鍾意熱鬧既人,我同佢咩都一樣
同月同日生日,鍾意既野都係一樣,但係唯一唔同就係呢樣野
都算啦,諗住有佢陪就得啦 , 點知,比我發現...
佢又再呃我玩icq唔比我知,仲話.....
Billy:我唔話你知,都係想你好過d姐,你知你幾敏感架啦
我:我都好想信你,但係你講果d野叫人點信,你都知你有前科架啦
真係偉大喎,想我好過d,你唔講大話既,我點會唔好過好呀
Billy:改下你d性格啦......
我:你要玩咪同我講囉,我又唔係唔比你玩,你光明正大講比我知你玩,
我條氣都順d丫,你講大話仲比我覺得你身有屎囉
佢仲要死都唔認自己玩,比我篤爆左先認,我真係好想知道,
如果講大話果個係我,我諗佢一定唔會就咁算囉,
我玩果時,佢就發哂脾氣,我已經係佢面前先玩啦,
平時都唔玩,仲要玩都係同d女仔玩,
仲想點,但係佢呢..?
根本就唔公平,結果又係咁我嬲左佢,
但係佢為左我,而無去同貓仔慶祝生日,
於是,我又好蠢咁,唔嬲佢,
仲比佢整古我,
因為我聞到milk味會嘔,
但係我睇睇下電視,
佢係廚房行出黎,一淡錫落黎,
但係佢個口含住d milk,結果我噴到佢成身都係,
第2日,我仲走出去用哂自己d零用錢,
買左件褸同張小雪poster(因為佢成日話小雪好靚)
我成朝無聽電話,一出現係佢屋企門口,
佢就好擔心咁問我去左邊,因為我係咁cut佢線...
結果,我地既xmas竟然係係佢屋企睇電視機倒數咁渡過
其實,我真係好想出去兜個圈,
又平安無事咁去到情人節,
係我呢一生日...最難忘既一個情人節..............
情人節前夕,我用左兩星期唔食飯既LUNCH錢買左好多野,
用左一個自己摺既大紙袋袋住D野(個袋有4張A4紙咁大)
入面有薯片啦(12包),
有佢鍾意食既雪糕啦(去到佢屋企樓下先買....我一買就買左1打)
有一張我自己親手畫既咭,同一盒好特別既糖....
(係一條條紅色....粗粗地....上面有D砂糖既呢...周圍都有得賣架...
有兩種...有一種係無D砂糖同幼小小...有砂糖就粗D咁架呢...軟糖黎架...
我都唔知你地明唔明我講乜添....)
我用一條條鐵線,扭成心型,
再將呢D糖,圍住個心心咁繞住,
一共繞左12支,連放呢D糖個BOX都係我自己整,
整到隻手比D鐵線吉到損哂,
仲有將D金莎,粒粒都包到好似心心咁,
仲有樽999個心心既樽,
放哂落個紙袋度,
可能你地會覺得,呢D野唔值錢,
但係呢D野,我真係放左好多好多心機落去整,
10:30 PM ...我同佢講,我要訓啦(當時係自己HOME)
第2日仲要返學,我再唔返同遲到,就無得考會考架啦,
我應承你,一放學就入黎比D驚喜你啦
當然佢聽到咁,就覺得好灰啦,
收線之後,我9秒9速度換衫搭車
係屯門,搭BUS去MK,
再係MK轉VAN仔去佢屋企,
諗住12點正係佢屋企門口出現,
點知早到左半個鐘,我係樓梯坐左半個鐘,
12點正拍門,
我見到佢當然呆左一呆,之後就懶醒咁同我講...
Billy:我都估到係你啦....
我:懶醒丫你...頭先有人把聲好灰架喎...
Billy:車..邊有喎...
我:咪住....登登登登.....(囉份禮物出黎)
Billy:嘩...咁大包...咩黎架..?
我:你開左咪知囉...仲唔開門...我等得份禮物都唔等得啦...
佢拆開份禮物之後,我見到佢既笑容,
我已經覺得好滿足,
我...好耐都無見佢笑得咁燦爛,
佢睇哂d禮物之後,
攬得我好實好實,
我真係好想停係呢一分鐘,
永遠都停係呢一分鐘,
係我最感覺到佢最愛我既一刻,
而佢就送左盒金莎比我(但係一開佢就食哂d金莎=___="
上面畫左一個公仔,係一個男仔黎,
仲有既就係佢屋企既key!
好正,好似認定我係呢間屋既女主人咁,
由於果晚真係好累,
一訓落床就訓死左,
醒左果時,見到個天勁光,
心諗,死啦呢次,唔知點同阿媽同school交代,
所以一起身就發哂癲係咁鬧佢,
鬧佢仲乜唔叫醒我,
仲乜由得我訓,結果佢完全唔應我,
其實我覺得佢係醒左,可能唔想我返學,所以扮訓,
我想睇下幾多點,發覺佢屋企d鐘,突然間唔見哂=____="shit...
條鎖匙又唔見左,但係佢成隻死豬咁訓係張床度,
我就更加嬲,好彩比我搵到佢收埋左條key係枕頭底,
我就問佢...
我:我搭車返屯門啦...你送唔送我落去..?
Billy佢望一望我...好明顯佢係醒哂).....咁緊張仲咩姐...你咪走囉...
我:姐係唔送啦..算...咁我自己走囉...
我出門口唔夠3秒,佢即刻彈左起身,
Billy:唉...我同你落去搭車啦...你比3分鐘我啦...
由等車至到上bus,我同佢一句野都無講過,
終於,差唔多落車果時,佢開口話...
Billy:你唔發覺...屋企有d唔妥既咩..?
我:咩唔妥...我覺得你唔妥多d喎....神神祕祕...又唔知做d咩對我唔住啦...
Billy:我琴晚見到你訓到咁lum...個樣又咁累...知你肯定好辛苦...日日都無覺好訓...
搭車搭黎搭去...今日又係情人節(佢唔講我差d完全唔記得...掛住炆返唔到學)
我專登收起哂d鐘...仲蚊左條電話線...
想見多我一陣....等我訓到過哂龍...咪唔洗返學...
之後果一下,我d眼淚係咁流,好感動,
係咁say sorry,原來佢做咁多野都係想我陪佢,
但係我竟然以為佢又唔知講咩大話呃我,
之後佢就陪我返左入屯門睇e生,囉e生紙,
返到屋企,當然比人鬧到死啦,
夜晚,就同佢去左聯合打機,
無啦啦有條友,走黎聊我,
係咁問我野,我已經縮佢,佢愈痴愈埋,
當佢見到想行過黎果時,條友即刻走,
事後,佢同我講..
Billy:我覺得自己好無用...保護唔到你...
我:傻瓜...仲咩咁介意呢d野喎...你有諗過保護我...對我黎講已經係最好既保護啦...
我大個女架啦..識保護自己架嘛...你都無可能24小時係我身邊架..係咪..?
Billy:但係呢件事令我覺得自己好失敗....
我:唔好亂諗啦....我知道你愛我咪得囉...
呢兩件事之後,令我更加緊張佢,珍惜佢,
因為,佢係第一個令我感動到喊既人,

唔知係咪我地同月同日生日既關係,
勁多野都係估唔到咁岩,
有次,佢同佢d朋友行街,我同我d朋友行街,
返到屋企傾電話,
竟然係同一個地方,睇中同一件衫,
又係另一個地方睇中同一條褲,
但係我地係分開各自各行架喎,
聽到果時,淨係識笑,都唔知比咩反應好,
傾電話又係,連續好多次,
我正想打比佢,一囉起個電話,都無禁過咩制,
就即刻聽到佢地把聲(唔知你地有無試過)
一係佢想打比我,一打我就即刻聽左,
食飯又係,果時成日同佢d屋企人食飯
一夾送,成日一齊夾埋同一舊,
連同d朋友出去行街,我同佢一係唔講野,
一講又講埋同一句野,
連d脾氣都一樣,勁硬頸,勁鍾意鬥氣,
example...
佢唔鍾意我同男仔講電話,佢唔會直接話我,
佢會專登係我面前打比個女仔傾電話,
等我明白佢咩感受,
明白佢示意叫我自動自覺收線,
我都係鍾意咁果d人,唔鍾意唔會直接話佢,
亦都係因為d性格太似,
大家明知自己錯,都係唔多肯自動say sorry先,
最後我地既感情....開始決裂...........
待續.....

碧根鮑華

因為我同佢一齊果時,一齊開左個新既email accout ,
個id係xxxlovexxx ,個password係我地一齊既日期,
所以,我成日都會check下自己耳email,仲會幫佢check埋,
跟住就發覺多左好多email,
但係我真係唔敢click入去睇,睇完唔知自己會點,
唯有扮唔知,
更加發覺佢愈黎愈電話打比佢,
愈黎愈古古怪怪,

直至有一日,我係佢屋企訓訓下,
佢拍醒我,問我
Billy:我問你一個問題丫
我:下...咩呀..訓訓下問咩問題呀...遲d先問啦(我真係好驚佢會問d咩)
Billy:唔係呢...你答左我先訓啦..
我:哦...咁問囉..(語帶悔氣)
Billy:如果我有第2個,咁你會點?
我一句都無答佢,就起身執野,
諗住走,佢咁問得我,
我已經估到咩事,
佢係果d好似講如果既人黎,
我一路執, 好想喊,
但係我一d都喊唔出,
當時我終於明白,
人傷心到盡頭,係唔會識喊,
我突然間有一種個心唔知去左邊,個腦諗唔到既感覺,
終於佢開口講
Billy:仲咩姐而家,你咁姐係算點?
我:我可以點?
Billy:你唔可以扮唔知既咩?我玩完識返黎咪得囉..
聽完呢句,我真係覺得眼面呢個人好可怕,
可能人地會覺得,佢仲識返屋企係好事,
但係我接受唔到同第2個人分男朋友,
邊個會鍾意同人分享自己愛既人?
我同佢講,
我 : 好丫,咁你有你玩,我有玩囉
Billy:唔得,我可以你唔可以,你係我既
佢真係珍惜我咩?我感覺唔到...
佢真係愛我咩?連我都答唔出..........
我一路執野, 一路諗返哂好多同佢一齊經歷既野,
人地話苦盡甘來,
但係真係咁理想咩?我諗至小我無咁既福氣,
我一句野都無應佢,
佢開始愈黎愈嬲,
嬲到,做左樣我呢世人都好記得既野,
佢竟然入廚房,囉起把刀,隊住我條頸,
同我講
Billy:你好停手啦wor,我無話過比你離開呢間屋wor
我:........你鍾意可以一刀介落黎....
Billy:你真係咁恨心?
我:你放過我啦,我好辛苦
終於,佢放低把刀,
但係我都係堅持要離開呢間屋,
我唔知點面對佢,
但係好大力咁捉住我條頸,
禁我落張床,要我訓返係度,唔比我走,
我唔夠力反抗,唯有對住牆訓,直至佢訓著,
我就做左個決定...............
繼續之前果d…
我做左個決定,,,
我趁佢訓著左 , 咩都無執 ,
換完衫著完鞋就搵鎖匙諗住走 ,
點知搵極都搵唔到 , 我知佢一定收埋左 ,
咁就問佢阿哥囉鎖匙 ,
我 : 可唔可以開門比我走?
哥 : 真係走呀 ?你走左就無得返轉頭架啦wor ? 既然自己鍾意既 , 就盡力去爭取嘛
我 : 但係我已經好累 , 我唔想再留係呢度啦
終於我都係走左去,
上到車,我一d眼淚都流唔出 ,
我都唔知係咪真係咁忍心,
真係咁捨得 ,
我望住一路上既風景 ,
諗返起所有我同佢經歷過既野 ,
原來以為會苦盡甘來 ,
係咪我放棄得太好?
心入面有好多好多疑問 ,
返到屋企 , 我咩都唔想諗 ,
一訓落床就訓著左 ,
可能太累啦已經 ,
日日都無得好訓 , 太多野要諗,
點知呢個時候...................

碧根鮑華

呢個時候....

就聽到佢打黎既電話,
Billy : 你仲乜返左屋企 ?
我 : ......... 唔想留係度咪返屋企囉...
Billy : 咁姐係點 ?
我 : 不如我地分手啦 , 好唔好 ? (其實佢話唔好仲有得救 )
Billy : ..............
我 : 我問你好唔好wor , 仲咩唔答我 ? 你唔想可以話唔好架 ! (好樣衰. ai...)
Billy : 咁你都講到出口 , 姐係你都決定左架啦 ...
我 : ........(好想喊......但係喊唔出) ...哦...咁好啦 .. 無野啦 ..
我諗左好耐 , 其實係咪我太衝動 ?
點解佢一句都唔留我 ? 係咪其實佢都想分手 ?
我 ... 呢一刻 .... 好似咩都無哂咁 ..
我 ... 好想搵個朋友呻下 , 無奈我好多朋友都話我有異性無人性 , 已經好耐無傾計 ,
我 ... 好想屋企人會關心下我乜事 , 無奈我為左男朋友 , 一早已經同佢地無野講 ,
我 ... 好想比心機溫書 , 會考明明就到 , 但係 , 我完全唔記得呢一年我讀左d乜書返黎 ,
我 ........... 好徨彷 .
於是出左街 , 去到一個熟悉又陌生既地方 ,
熟悉既係 , 我一星期起碼會有5日係度出現 ,
陌生既係 , 每次同我一齊黎果個人 , 唔見左 ,
好寂寞 , 睇住街上面既人一對對 ,
我 ..... 自己一個 , 唔知做乜 ,
忽然間 , 我見到 .......

見到 Billy 同一個女仔出現係我眼前 ,
好明顯佢地眼神就好似一對情侶咁 ,
旁若無人 , 根本就見唔到我係附近 ,
以我既性格 , 應該實會走埋去 , 起碼睇清楚果個女仔咩樣丫 ,
但係我真係唔知點面對 , 我反方去咁走 ,
一路喊一路撞住走 , 自己都唔知走左去邊 ,
腦裡面淨係諗到佢地對望既眼神 ...
最後忍唔住 , 打比佢 , 問佢係邊 ,
睇下佢會點答我 ,
我 : 你.... 你 ... 你 ..係邊呀?
Billy : 我係太子囉 , 仲乜?
我 : 同邊個呀 ?
Billy : 貓仔咋嘛 , 仲乜事 ?
我 : 無野呀 , 我過兩日黎執返哂d野走啦 , 係咁啦 , 88
我無勇氣聽佢答我咩 , 我好驚佢會好似無野咁答我 "好呀"
點解要呃我 ,,? 到呢個時候都仲要呃我 ?
夜晚我唔知去邊 , 又唔想返屋企 , 同埋阿恩個妹係間餐廳度傾計 ,
中途我去左7-11買野飲 , 結果我做左樣好蠢既野.....
之後...
我都唔記得自己買左幾多排必利痛 ,
食哂落肚 , 果時完全係報復心態 ,
我要你內疚一世 , 要你後悔無好好珍惜我 , (大家千祈唔好試 , 好辛苦架)
睇返自己手上面之前界左果個豪字 , 你個名 , (之前唔記得左打呢件事 =____= " )
好記得 , 果時你見到 , 就係你手界返我個名 ,
但係相信而家已經埋左口好返哂 , 睇唔到lu ,
我就過返去搵恩妹 , 佢見我個樣唔妥 ,
估到我做乜黎 , 最後我都係講左比佢聽 ,
於是恩妹就打比佢
恩妹 : 你條女食必利痛自殺lor !
Billy : 下 ? 唔係我條女啦 , 散左啦 , 你地係邊呀而家 ?
恩妹 : 係旺角囉
Billy : 食左幾多粒呀佢?
恩妹 : 唔知呀 , 你黎唔黎搵佢呀 , 你睇下佢啦
Billy : 唔黎啦 , 我落d , 你幫我睇住佢啦
就係咁 , 我仲慶 , 估唔到一齊左咁耐 ,
我既生死 , 都唔夠佢去玩重要 ,
結果, 我即刻係咁打比果d不嬲落d既朋友 , (我未落過d 的果時)
我同恩妹就落左3星 ,
去到我已經好辛苦 , d必利痛散 , 個人勁暈 ,
之後恩妹又識左d 人 , 仲比糖我食 , 比k我索 ,
我完全無諗過後果 , 只係想呢一刻咩都唔好諗 ,
點知 , 到天光 , 恩妹拉我走 , 話我條裙比人拉到爆開左 ,
仲唔走比人搞都似 , 於是我就出左7-11 坐 ,
完全唔知自己應該做d乜 , 可以同邊個講 , 搵邊個理我 ,
我打比Billy , 但係佢無聽到我電話 , 我諗佢唔會再理我掛 ,
我打左比Billy個朋友 ,
同佢傾左好耐 , 佢叫左Billy出黎接我 ,
原來Billy已經返左屋企 , 再出返黎搵我 ,
佢見到我好嬲咁打左我一把
Billy : 你睇下你e家 , 人唔似人 , 鬼唔似鬼咁 ?
我 : 我咁樣都係你一手做成
Billy : 無人迫你咁做架wor
結果我同佢一齊返左佢屋企 , 返到去 ,
佢仲好關心,好溫柔咁問我有無事 ,
仲攬住我訓 , 我係咁問佢 , 可唔可以同果個女仔分手 ,
我當咩事都無發生過 ,
佢仲同我講比d時間佢 , 叫我乖乖地訓 ,
我以為我地真係會和好如初 , 結果 .......
我以為我地會和好如初............. 原來 .

朱古力mousse

快ｄ　ｐｏｓｔ啦∼好想睇埋落去呀∼快ｄ　ｌａ∼∼∼＞．＜
我覺得個女仔唔值得可憐囉∼為左個男仔搞到自己咁∼
雖然忘記一個人係好辛苦∼但係到應該放手既時候就唔到你唔放手架ｌａ∼
比你一齊得番都唔代表一定開心ｌａ∼咁執著做咩∼

碧根鮑華

繼續............
佢根本就無諗過解決 ...
想既可能係我接受同人share男朋友..
或者我自動離開 .
訓醒既時候 .發覺..
訓係我隔離既佢.......已經唔知去左邊....
我又好似平時咁大叫..
因為.....每一次我大叫....佢就會即刻出現返.....
驚我有事..
但係....此情此見已經不再.....
我打比佢.....竟然電話都唔聽 .....
地底佢去左邊....?
又去左搵果條女嗎 .......?
我想走.但係..發現佢無留低鎖匙比我.
姐係點..? 要我留係度等佢返黎 .... ?
我係佢屋企 . 如常咁幫佢執屋....
天黑既時候.
佢終於都返黎...
我: 你終於都返黎啦 ?
Billy : 你訓醒啦 ? (勁冷淡)
我 : 你 ................... 去邊黎 ?
Billy : 行街打左陣機咋嘛 , 見你訓得咁lum , 咪廢事嘈醒你lor ,
我 : ....... 哦 .
Billy : 點解唔問我同邊個 ...?
我 : ..........
Billy : 我同左阿微 ( 佢另外條女 ) 同貓仔出去...
我 : . 你到底想點呀 ? 我好辛苦呀 , 你有無諗過我感受架 ?
點解你咁恨心咁對我 ? 真係鍾意一個人 , 點會想同人share ?
你話過叫我比d時間你解決 ? 你係咪根本無諗過解決 ?
如果你唔鍾意我 , 咪同我講囉 , 我就黎崩潰 .....
我會考架啦 .....點解要係呢個時候搞成咁 ? ....
就係因為我講左呢堆野....佢開始覺得我好煩.
覺得我埋怨佢....... 但係我只係好想話比佢知.
我咩感覺....我有幾難受.
就係咁...我好決心咁走左 .....
出左門口....我好迷惘....可以去邊 ....?
屋企人已經唔歡迎我返屋企 .?
朋友 ? 我諗個個都會覺得我抵死 .
我......唔知去邊好..
就係佢屋企樓下m記.....坐左好耐 ........
等咩?..我都唔知..或者係佢既電話....
等佢哄返我 ? 我知好蠢 ....明知等唔到.... (明知等不到亦要等 ,還好有眼淚來陪襯 ) .
一路喊.一路等 ... 好多唔識既人望住我 .
但係我真係控制唔到 .. 正當我想走 .
行落bus stop果時 .
電話響 ...
係佢.....係佢打黎 ...
我 : 喂 (扮哂開心)
Billy : 喂 , 你會唔會黎執走d野 ....?
我 : 下 .......( d眼淚即刻係咁湧 ..... 趕我走嘛 ? )
我會 ! 你放心 , 我唔會阻住你d地方 . 我過兩日黎囉啦..
Byebye .....
點解要咁做 ..? 大我 ?鬥氣 ?
因為我唔甘心.因為我真係好愛佢...我搵左好多理由比自己..
佢咁講...只係想刺激我....
只係想我投降返返去佢身邊 ....
我.....決定同佢鬥過 ...............
待續...........

碧根鮑華

由我同佢一齊果時開始 .... 我就留長d頭髮...
因為佢同我講...佢鍾意女仔長頭髮...
我好鍾意佢幫我吹頭果d感覺.......
但係到分開左....我見到一把長髮就好憎...
一見到就諗起佢.....
於是我令佢知道.....佢對我係有幾大影響...
雖然我知呢d做法好幼稚.....
我第2日...即刻去cut左一個好短好短既頭..
一路cut一路喊.....
剪一下...就好似話比我知.....
由呢日開始...我同佢已經再無關係咁..
結果我剪左個呢一生人最短既頭.
仲改變平時既衣著.....因為.....我知佢鍾意我著得女人D...
果日我一身OVERSIZE打扮....去到佢屋企執野...
佢見到我既第一個反應係呆左...
我無理到...入到屋...就係咁執執執....其實我好想佢會開聲留我...
我都有諗過一巴星埋去..
但係我偏偏唔捨得.
一路執...我背住佢...但係佢住係床尾睇住我執.....
我FEEL到...大家都好沈默...好唔開心....
終於...佢開口...問我...點解我要剪到個頭咁..
Billy : 點解要剪到個頭咁..?
我 : 想剪咪剪 ... 以前做乜都要諗埋你鍾唔鍾意...
而家我想做乜就做乜...幾好丫..
我都幾鍾意而家個頭呀...又唔洗成日吹...
Billy :我知你同我鬥氣 ... 但係都唔好囉自己黎搞丫 .
我 : 我無wor , 你係我心目中唔係重要架咋 ... 唔好睇得自己咁勁 ..
Billy : ...........
其實我feel 到....我真係feel到佢鍾意我 ....
我feel 到佢眼濕濕 ... 但係我唔甘心..
我唔甘心自心軟成世比佢食住...
我繼續扮唔知...
執左d...就諗住走...(其實我未執哂....因為我仲想搵機會可以見下佢 )
我 : 我囉唔哂...下次再黎執埋啦...
Billy : 哦 ... 真係走啦 ...?
我 : 你都幾好笑架wor ... 唔走留係度做乜 ? 係咁啦 ... byebye

一出門口...我又忍唔住喊...
唔通真係耍鬥傷害大家...傷到無得再傷先開心嘛?
我好憎自己果d唔輸得既性格...
見到佢咁...我個心都唔好受...但係一諗返轉頭..
佢做初一...我做十五...姐....
我依舊咁....落返m記坐....
等咩...?等佢打黎..........我都唔知.
佢一樣有打比我...我聽左....
我 : 喂 ...................... ?
Billy : .............................( 有d喊聲 )
我 : 點呀 ? 打黎唔講野 ?
Billy : ........... 你係邊呀 ?
我 : 係樓下m記囉 .......
Billy : 仲咩........?
我 : 下...... 做咩咁又點...........?問黎仲咩 ......?
Billy : .... 唉 ......
我 : 唉咩.......? 你喊乜呀.........?(心軟again !!!!! 超失敗 !!!!!!!! )
Billy : 我唔想搞到而家咁....你可唔可以上返黎再講...?
我: 下..... um....... um....... 唔知呀..
Billy : 你上返黎先啦.........好啦...
我 : .........唉 ...ok啦..

其實...佢好小會咁...真係好失敗...
次次都比佢睇穿我心軟 !!!!!!!!!!!!!!!!!!!!!!
返到上去.....
一開門...我見佢坐左係梳化度...卒眼.
我走埋去.......佢攬住我..
我懷念呢種感覺....係好真實....雖然只係無攬幾日.
但係呢d咁真實既感覺已經無左一排.
我呆左...我係度諗.....
點解...咁 ? 唔捨得 .... ?
我應該點做 ..?
Billy : 我地重新開始丫 ? 好似以前咁丫 ?
我 : 真係可以咩....?我唔可以當無事發生過.....
Billy : ........ 點解 .
我 : 因為....我太愛你....所以我決定離開...
我要走啦...你唔好咁啦...我知你好快會無事...
.(其實最有事果個係我 , 我一定有排都唔會開心.佢愈開心我愈傷心)
走左之後.....我打比貓仔..傾左好多計...
知道果個女仔咩樣...叫咩名...佢地點識...
佢同我講...叫我放過billy ....話billy好鍾意果個女仔..
咁我呢..?我同佢既所有野唔通只係發夢咩.....?
其實我知..我知貓仔一路都唔鍾意我同佢一齊..
我唔會咁易放手囉.....我地經歷咁多野...
真係比唔上一個岩岩識既女仔..
我知男仔貪新鮮......但係我唔信我地咁經唔起考驗...
我既報心態就開始愈黎愈重........
終於........

嘉文哥

呢個愛情故事只不過講個女仔不斷比人玩緊,而她的男朋友玩緊她,喜歡對她好,不喜歡,同另外一個女仔一起!