我前幾日係澳門電台聽咗個鬼故,
都幾恐怖,心都寒埋,
係一個聽眾ge朋友ge經歷,
個聽眾打上電台講ga:
有一對情侶一直都有同居,
而且租住咗一間屋兩年,
但由於而家澳門經濟好咗好多,d樓價升得好緊要...
個業主要佢地搬走,加上租約又滿咗,
都局住要走...
因為而家係澳門租屋真係好貴,
睇來睇去都唔滿意,
到咗得返一個星期,
佢地個經紀就介紹咗一間兩房一廳,$1100的屋畀佢地,
(我知呢個價係香港算平,不過而家澳門來說先算ok,
因為而家就算一房一廳都升到要$1600)
雖然心知唔妥,無理由咁平,但佢地無辦法之下,
而且時間緊迫,只好租.
不過經紀話屋主只肯租一間房同埋個廳畀佢地住,
因為屋主隨時會返來住一兩日咁,
而情侶又無要求打開間房睇吓係點,
因為佢地都諗住唔住得耐...
開頭個幾日都無事ge...
直到有一日,個女仔夜晚要去廁所,
佢出咗房,嚇然見到好似有一個人坐咗係廳咁...
佢心知不妙,於是廁所都無去,
返入房同佢男友講,就都計劃快d搵地方搬;
之後幾日都無事,
直到又有一日ge夜晚,個女仔又去廁所,
咁佢出到去,見到個廁所門關咗,個女仔見呢幾日無乜事,個心都大膽少少,
諗住民"擰"開度門,點知係個時間,
個廁所入面傳來沖廁所聲...
佢即刻好驚,諗住返入房,點知佢腳軟,
一轉身,即刻坐咗係地下,於是佢大聽叫佢男友出來,
佢男友出來嚟,問佢咩事的時候,
廁所門"啪"一聲開咗,有一個亞婆ge頭飄咗出來...
男友即刻攬住個女仔,唔畀佢睇,自己都合埋眼,唔夠膽睇.
到咗第二日,佢地叫個經紀上來,
仲要叫埋個屋主上來,
三口六面同佢地講有件咁ge事,要求退返d租...
個業主(女人)聽完之後,就話拜吓神就無事...
於是即刻攞咗d香,開咗房門入去,
個男仔好奇就入去睇吓,
原來成間房係"吉"ga,咩家具都無,
靜係得一個神台..神台上面張相就係一個亞婆..
原來個亞婆係業主個家婆..
佢生前係住係呢度,死後家人就諗住安個神位,畀返間房佢住....
我個人就覺得呢件事真係好恐怖,
係屋企有d咁ge野就唔好租畀人住啦...
嚇死人咩..
我想問吓大家,
你地覺得佢呢個做法你咪好唔妥?
應唔應該係間房入面安一個神位畀個先人?
應唔應該留返一間房畀佢住呢?
咁樣對先人係咪唔係咁好?
好似留住佢係度,走唔到咁...
唔好意思..有點長...
希望大家畀d意見... |