|
網民講鬼故
紐約自助洗衣店恐佈驚歷 他持續半年在褲袋內不斷摸出人的手指甲 標籤 : 洗衣店 , 硬幣 , 紐約 【Cyber X-Files網民驚歷】在自助洗衣店洗衣千萬不要做這件事 以前我住係紐約，成日都會去嗰啲自助洗衣舖洗衫。美國有好多人同人分租單位，好多人屋企都無洗衣機。呢幾年香港多咗好多劏房，週街都開咗好多自助洗衣舖，我每次見到嗰啲洗衣舖我就諗起係美國去洗衣舖嘅恐佈經歷。 我以前住嗰到附近有兩間自助洗衣舖，其實兩間距離都差唔多，我一直去開同一間。有一日我去開嗰間洗衣舖部散銀機無晒散紙唱，我通常半夜三更先至去洗衫，貪佢無人。 嗰啲好鬼舊嘅洗衣機淨係收25仙，我無散銀就唯有去另外果間啦。嗰間洗衣舖一個人都無，我嗰時都未識驚。 我係洗衣舖到唱完錢就開始洗衫，我習慣分色洗，一霸霸咗三部機。我走去望下其他機有無啲人啲褲袋跌咗啲coins出嚟漏咗啲洗依機到。竟然被我真係搵到一個25仙。 我執咗個25仙硬幣袋落褲袋之後，洗完衫乾完衣就返咗屋企瞓。第二朝起身，我嘅惡夢就開始。 我晏晝出街搭地鐵時係褲袋到拎張地鐵月飛出嚟嘅時候，係褲袋到摸到啲類似指夾嘅嘢出嚟。我拎出嚟睇，X！真係手指夾嚟，仲要好鬼長，好似啲清朝人啲指甲咁長，好恐佈。 我掉咗落地之後再摸下個袋，仲有呀X！我再丟咗佢，再摸下個袋。連續重覆咗幾次...唉今次死喇，我已經feel到舐嘢喇。 我放棄在擺隻手落去個褲袋，夜晚返到屋企之後我再摸下個褲袋，都仲摸到啲指甲出嚟。嗰個coin我都搵唔返，因為我返到屋企就全部coins丟晒係檯面。 我唔敢再著嗰條褲，亦唔敢再去果間洗衣舖。但係我著其他褲都仲係摸到指甲，雖然好驚，但係呢件事有無實質影嚮到我生活，我唔丟啲指甲，咪當無嘢囉。大佬，一個人係美國，又唔識啲咩唐人師傅，你叫我可以點。 大概半年後卒之有一日，我唔知點解出錯咗地鐵站出口，要經過嗰間洗衣舖見到我個屋住咁啱係裡面洗完衫出嚟，我同佢傾咗兩句。 嗰個係唐人屋主嚟嘅，我問佢：「咦，你平時都嚟呢到洗衫嘅咩？」 佢話：「係呀呢間嘢好耐㗎喇，我識個老闆嘅。」 佢無啦啦就講起，佢地以前移民嚟美國無咩工可以做，華人唔係做車衣就係做洗衫。佢講咗句：「唐人開洗衣舖，清朝開始㗎喇。」 聽完呢句嘢，嚇死我。 我心諗，我唔係嘢到啲清朝鬼呀？ 佢繼續講：「唉，不過後來越嚟越難做，都轉晒做呢啲入銀仔㗎喇。」 我返到去不安咗成晚，我突然諗起我係檯頭儲咗幾年都無用過嘅coins，我次次去洗衫都無拎去用。我諗起，呢到一定有嗰晚執到嗰個銀。 我唔理喇，我全部拎晒去嗰間舖。當然啦，我為咗唔好咁外眼，我拎埋啲衫去洗。洗衫嘅時後我一邊入銀，一邊講：「對唔住呀，拎錯咗你個銀，我依家俾返你啦。」 我啲銀，一次係用唔晒嘅。我之後隔咗一段時間都繼續返去洗衫，每次都講對唔住。 之後兩三個星期，終於用晒啲銀。我有日專登去摸下個褲袋，真係再摸唔到指甲。 我後來睇返啲書講清朝啲華人去到美國幫人洗衫，最初就係用手洗，用手洗衫應該好容易斷指甲。唔通佢怪我連佢啲「辛苦錢」都要同佢搶？ 就係咁我以後唔敢睇下啲洗衣機有無人跌錢。 | ||||||||||||||
 | ||||||||||||||
 | ||||||||||||||
 | ||||||||||||||
 | ||||||||||||||
 | ||||||||||||||
| ||||||||||||||
