|
網民講鬼故
細個嗰時為咗證實尾班車傳聞 我日日用望遠鏡睇住...結果... 標籤 : 杏花邨 , 地鐵 , 紙飛機 【Cyber X-Files 網民經歷】香港的都市傳聞歷久不衰，其中地鐵尾班車傳聞言之鑿鑿，有網民憶述約二十年前，在地鐵車廠杏花邨有此一奇遇。 話說我細個住杏花邨，杏花邨原本就係為咗起地鐵車廠而填海而建，而前未起隔音蓋，我可以係屋企清楚望到列車入站。 我最鐘意數地鐵，尤期有次睇完港台節目「奉告」邀請地鐵人員解答，「尾班車鬼故傳聞」。當時社會普遍傳說，地鐵會在每天最後一班車之加開一班次乘載鬼魂。當時地鐵發言人在節目上當然否認此事，而我就係因為呢個節目，每晚唔瞓覺拎住個望遠鏡係到望望望，睇下你係咪真係有尾班車。 直到有一晚，我好記得係某年六月頭，因為電視有燭光晚會。老豆睇完新聞熄電視，叫我去瞓我就又偷偷拎個網遠鏡出嚟睇地鐵。 我係望遠鏡到見到有班人拎住白燈籠係路軌到行，果道係筲箕灣站通往杏花邨站嘅隧道出口。 我唔用望遠鏡望，一樣望到嗰班人。 我心諗，無可能嘅。點會有人係路軌到行。 嗰時好鬼頑皮，又因為睇咗嗰啲捉鬼戲，我走去拎張黃色紙，用紅色筆亂畫咗道符，再摺隻飛機掟出去，連續掟咗幾隻。(高空擲物係唔啱㗎，不過嗰時有句嘢叫有怪莫怪，細路仔唔識世界） 飛機飛到落路軌，嗰啲人唔見咗。當然，我唔會認為嗰啲人因為我亂畫符而消室。 其實嗰時，掟飛機落路軌嘅唔止我一個，因為我見過路軌上面有其他飛機。 令我更心寒嘅係，後來杏花邨站路軌起咗隔音蓋，基本上路軌已經變咗封閉式。大個之後，有次我係月台等車，我見到不停有黃色紙飛機係路軌暗處從上而下飛落嚟。 我即刻諗返起呢件事，我心裡面即刻講返句：「怪莫怪，細路仔唔識世界。」 嗰度肯定就無可能有人掟飛機落嚟㗎喇，至於啲飛機係咪我掟嘅，時空交錯嚟咗呢度，定係唔止我一個玩啲咁無聊嘅嘢就真係唔知喇。 | ||||||||||||||
 | ||||||||||||||
 | ||||||||||||||
 | ||||||||||||||
| ||||||||||||||
