網民講鬼故
我原本諗住買細啲住大啲,係觀塘租咗個迷你倉,真係好恐佈... 標籤 : 觀塘 , 迷你倉 , 升降機 【Cyber X-Files網民驚歷】我原本諗住買細啲住大啲,係觀塘租咗個迷你倉,真係好恐佈... 香港啲租越嚟越貴,真係唔買細啲住大啲都唔得。大屋般細屋,間屋越嚟越少位放嘢,我就走上網睇下邊度有迷你倉租。上網見到$199一個月,仲要係觀塘工業區,市區咁鬼平我就走咗落去咗租啦。 上到去迷你倉個office佢哋帶咗我去另一幢工業大廈到睇倉。嗰幢大廈個入口係後巷入,好偏僻。條後巷日頭都好陰森,無咩陽光。佢嗰啲(車立)好鬼舊,係拉閘嗰啲。 上到去迷李倉嗰層,個(車立)口等(車立)嗰個位勁黑,係完全密閉嘅空間。嗰時心諗,見佢咁平,又唔係自己住,我就租咗個倉。 第二日日頭,我就叫我個Friend同我一齊叫咗架貨van搬啲嘢上去。幢大廈有一架貨(車立)同一架客(車立),我地搬完嘢之後就㩒(車立)走啦。架(車立)係10樓,我地入到(車立)咁啱同(車立)有一個速遞公司嘅速遞員。如果你係工業區返過工,你應該知道速遞員嘅1秒係等如你嘅10秒,入(車立)遲少少都俾人X。 嗰㗎(車立)唔知點解,好鬼慢,嗰個速遞員係咁㩒個「G」掣。我心諗,你係咁㩒把托咩,㗎(車立)唔會快啲㗎。 去到6樓,又係迷你倉,不過係第二間公司。有一對情侶係到搬嘢入(車立),嗰速遞員係呢個時間爆炸喇:「快X啲啦!」 係呢個時候,㗎(車立)嘅燈熄晒,嗰個等(車立)嘅密閉空間都無晒燈。 大家都嚇咗一跳,好彩而家有手機,大家就開咗手機燈照。我地睇嚟係全幢大廈都無電,最弊係嗰個死人迷你倉度電門因為無電,跟本開唔到,然後條走火梯係要經過個迷你倉先去到。 即係話呢一刻,如果火燭,我地係死硬,我真係唔明點解佢會過到消防。 最弊嘅係,呢啲觀塘工廠區有好多死位,加上密閉空間好難收到電話。 我地五個人企咗係度唔知點,嗰個速遞員把口仲要唔收:「X你老母,無喇無喇,叫X咗你地快啲。」 嗰對情侶唔理佢,試下閂埋到閘睇下㗎(車立)會唔會郁。點知㗎(車立)真係郁,但係都係郁得好慢。我地fee到架(車立)一路落都唔到地。 我個friend問:「我地會唔會撞嘢呀?」 個速遞員就搭嘴:「撞你老母呀!」 係呢個時候架(車立)就跌得好快,個對情侶個女仔就喊埋出嚟。 奇怪嘅係,一路跌都一路唔到地。 呢個時候嗰個速遞員知衰喇,我哋聽到佢細細聲係到講:「對唔住呀我下次唔敢喇。」 突然架(車立)停咗,有返燈,我地開閘已經到咗地下。 個速遞員就九秒九一衝衝咗出去。(車立)口個看更係門口度破口大罵:「話X咗你啲人咪咁X自私,成日開住度門係六樓唔俾㗎(車立)落嚟。 」 個女仔喊晒口咁話:「頭先困(車立)呀!」 個看更話:「我...我都唔係話你哋...」 成件事,好詭異。我唔知係咪停電咁簡單,但係我租咗一個月之後都唔敢再租嗰度,我寧願丟曬啲嘢都唔租迷你倉喇。 | ||||||||||||
| ||||||||||||