網民講鬼故
我做家務助理幫人執屋 好多人屋企都有鬼... 標籤 : 港灣豪庭 , 大角咀 , 鐘 , 小朋友 我係做家務助理嘅,成日要上好多人屋企做嘢,我可能天生易撞到嘢,好多時都會係人地屋企見到鬼。 見鬼嘅地方咩都有,唔理貴嘅豪宅私樓,定係公屋居屋。我本身係提早退休公務員,因為太悶就出返嚟做下家務助理。講真,香港人真係好鬼cheap,俾小小錢永遠當家務助理好似古代妹仔咁。最怕有啲人呢屋企個鐘係較早咗成十幾分鐘,有啲最離普嘅係較早咗半個鐘,你明明準時上到去,佢話你遲到。我心諗今時今日唔係用電話個時間作準,你自己個鐘快成半個鐘可以話我遲到嘅咩?我成五十幾歲都睇電話時間算啦,都唔會成日睇住個舊式鐘當係全世界都係跟自己個鐘。 入正題,有一次我去到一個兩房家庭,嗰個家庭係港灣豪庭,戶主係四十歲左右嘅女人,佢應該同老公同一個小朋友住。港灣豪庭對住殯儀館,都幾猛㗎。我去到佢屋企做嘢第一次,做咗三個鐘,我睇下自己個電話,五點鐘夠鐘走人。但係佢牆上面個鐘係四點九,唉,我諗住第一次做算啦,等到佢個鐘五點先出聲講拜拜啦。 點知佢個鐘一路都唔行到五點,我睇下電話去到五點半個鐘都係係四點九,我諗住佢個鐘係壞嘅,我就同佢講走人。佢跟住睇下牆上個鐘話:「四點九咋喎。」 我話你個鐘唔啱,你睇下個電話。佢係到話:「無可能㗎。 」再睇下佢自己電話:「吖係呀係呀,唔好意思。」 我走咗之後,一個星期之後再上去。我今次睇實佢個鐘,兩點開始嘅,同我個電話一樣。但係情況又係同上次一樣,去到五點佢個鐘都係四點九。我今次直情同佢講走人。 第三次第四次都係咁情況,個女人話:「點解你次次上到嚟個鐘都壞?平時真係無嘢㗎喎。」 我心諗,你唔洗搵啲咁嘅籍口㗎喎。 第五次,我專登係我個鐘四點九時就望下個鐘郁唔郁,點知俾我見到啲恐佈嘢。 我見到有個小朋友人形黑影依住幅牆走上個鐘到,之後落返嚟走咗入小朋友房。我見慣,唔會太驚,我好奇跟住入房。入到去就有把小朋友聲話:「我呀媽話你哋啲工人成日都吞噗唔做嘢呃錢呀!」 我聽到之後好鬼嬲,明明我做足工夫㗎。雖然唔知佢係咪話緊我,但我索性唔幫呢個家庭做。 我諗呢個係佢死咗嘅女,我係到諗父母對子女影嚮真係大,連死咗都「陰魂不散」,整蠱人哋就係因為佢呀媽覺得啲家務助理吞噗。 其實好多人都係咁諗,永遠覺得家務助理做唔足,但又無錢請菲傭或者唔捨得洗多啲錢請人密啲清潔。但係呢啲大人心裡面嘅說話,由鬼小朋友講出嚟真係諷刺。 | ||||||||||||
| ||||||||||||