|
網民講鬼故
調景嶺有個廢棄咗嘅巴士站 我入到去有一道光... 標籤 : 調景嶺 , 巴士站 , 墳場 我諗如果我話調景嶺猛鬼，無人會否認。好多人都聽過商人倫尼在該處吊頸嘅舊事，該處因而得名吊頸嶺。 我前幾年一家三口租咗調景嶺一個私人屋苑嘅單位，嗰時已經起咗個墳場入口。 嗰個屋苑有一個廢棄咗嘅巴士站。雖然呢啲地方都長開住燈，但個屋苑咁多人住，有個廢棄空間無人用，你都咪話唔恐佈。據講，當年政府規劃錯誤，要求呢啲新市鎮預留巴士站空間，初期又無地鐵，後來地鐵通車，啲巴士同小巴都無人搭，所以巴士站就荒廢咗。 話說有一日，我同我老婆講，屋企下面有個巴士站但係無巴士到㗎，好得意。 我老婆唔信，我食完飯就帶埋老婆同仔仔落去散步，順便証實俾佢睇我無呃佢。 落到巴士站，我地因為慣咗食完飯散步，所以橫掂落到去就係嗰度行下啦。越行越入，特然係巴士站入口嘅反方向有一度白色強光，嗰種強光係光過車嘅高燈。我意識到佢唔係人類嘅機器發出，我直覺覺得會傷害小朋友眼睛第一時間就用手掩住小朋友眼睛先。 我小朋友係到大嗌：「好光呀 ！」 嗰啲光光到我分唔到係咪移動梗嘅嘢，我地想行返出去都搵唔到路。我心諗既然我地頭先係向呢個方向入嚟，我地返方向出返去咪得囉。 我一手抱起我細路，另一隻手幫佢掩住對眼，調轉行，我已經無機會理我老婆。 我衝出去，感到突然好黑，姐係由好光去到好暗你會突然睇唔到嘢。成半分鐘之後我睇得返嘢，我企返喺巴士站外，我望入巴士站入面一切正常。 但我老婆唔見咗，我心諗死啦，咩事呀。 我打俾我老婆，佢話佢唔知點解一睇返嘢就係墳場條通道入面。墳場條通道係係調景嶺嗰度通去山上墳場，夜晚佢會鎖埋個閘。屋苑居民係起呢條路之前曾經反對過，但當然無用啦。而條通道係起得好夾硬架，佢有部份係係海上面嘅橋，再通上山上面，完全違反山勢。 巴士站雖然近嗰條路，但係完全唔通，我老婆無可能無啦啦去咗嗰度。 我即刻走過去嗰邊啦，我老婆鎖咗係閘入面。我地要同保安解釋一輪，講真係墳場做保安，唔會想多事，佢唔想知咁多嘢，佢要我老婆講佢係係日頭入墳場行錯路趕唔切落山，等佢好辦事先肯開閘俾我老婆出返嚟。 但我個細路竟然好似咩都無發生過咁，無問問題若無其事定失憶咁。 調景嶺真係…好邪！ 編按：網民投稿，有關確實地點無從考究，請自行判斷事件的確實性。 | ||||||||||||||
 | ||||||||||||||
| ||||||||||||||
